Departamento de comunicación do Mar de Muros Tríatlon – Trofeo Iván Raña

Tras un ano de traballo, volve o deporte e o tríatlon a Muros. A segunda edición do Mar de Muros Tríatlon - Trofeo Iván Raña conta con máis forza e con importantes novidades que darán maior estabilidade á proba.

Onte, 10 de abril, tiña lugar a presentación do II Mar de Muros Tríatlon - Trofeo Iván Raña que se celebrará o próximo 8 de xuño na vila de Muros. No acto de presentación  no salón de plenos municipal contou coa presenza do propio Iván Raña, María Xosé Alfonso (alcaldesa do Concello de Muros), Tono Uhía (Concello de Muros), Ezequiel Mosquera (EME Sports), Luís Vázquez (CC Muros), Isma Prigue (Club Os Salta Rejos) e Lucho Ferreirós (CR Muros).

10 horas foron o que duraron as 150 prazas que se poñían a disposición dos/das triatletas para esta segunda edición, mentres que se o comparamos cos datos do ano pasado as persoas participantes foron 127. Dende o Concello de Muros comunicamos con ilusión a alegría pola expectación creada pola proba, o que nos obriga estar á altura na súa organización.

O primeiro español campìón do mundo en tríatlon, Iván Raña, portará o dorsal 1 na II edición do Mar de Muros Tríatlon. O triatleta de Ordes é todo un exemplo de esforzo, constancia, disciplina e sacrificio. Estes valores leváranno a ser un dos mellores triatletas do mundo ademais de conseguir un brillante palmarés no que destacan un campionato do mundo de tríatlon, dous campionatos de europa de tríatlon e tres participacións nos Xogos Olímpicos (Sidney, Atenas e Pekín).

Muros | 04.06.2018. O de Bergondo, Nicolás Rodríguez (Disa Hps Triatlon), tivo claro dende o inicio do sector de ciclismo que non podería gañar a proba esperando á carreira a pé. Ou mellor dito: tivo claro que quería gañar a proba. Aferrouse ás súas armas, neste caso a bicicleta. Nadou forte, puxo un ritmo moi alto na bicicleta que provocou o corte e correu a un ritmo moi rápido para alzarse como campión.

Se quería conseguilo tiña que ser agresivo e provocar cortes no sector de ciclismo e iso produciuse na última volta, xa que despois dun durísimo ataque, logrou rachar o grupo de 6 unidades na que destacaba a presenza de mozos como Arturo Ramos ou Martín Casal (ambos do Club Triatlón Compostela). Nun primeiro momento marchouse só pero aos 300 metros e despois dun grande esforzo, Estebán Rodríguez (In Side Logistics Aguere) logrou contactar con el.

Á saída da T2, o reloxo contaba os segundos, que chegaban e superaban o minuto, para informar coa marxe que terían que defender Nicolás Rodríguez e Estebán Rodríguez fronte ao grupo perseguidor e o deportista local, Manuel Dosil (Olímpico de Vedra). Librarían os 5 quilómetros ao límite, coa gacela Manuel Dosil remontando rapidamente neste sector (no que foi o máis rápido) e no que finalmente remontaría ata a terceira praza, quedando a escasos 9 segundos de Estebán Rodríguez que sería finalmente segundo.
Domínguez aguantou e camiñou en solitario. Levouse o triunfo da proba e o recoñecemento do público e dos rivais.

Na categoría feminina a cousa resultou ben distinta porque dende o primeiro sector de natación a compostelá, Adriana Pensado (Tríatlon Arcade Inforhouse), marcou unha gran diferencia respecto ao resto de rivais. Arrancou da T1 con máis de 2 minutos de diferenza respecto a Laura Caamaño (Kurai), segunda en saír da auga. E baixouse a T2, agrandando esa diferenza en máis de 6 minutos respecto a Laura Caamaño e en 3 minutos a Estefanía Abelenda (Tríatlon Arteixo). Estas grandes diferenzas non fixeran que Adriana se relaxara e seguiu correndo cara a proclamarse campioa do I Mar de Muros Tríatlon cunhas diferenzas finais de máis de 8 minutos coa segunda clasificada que foi Estefanía Abelenda e de 12 minutos con Laura Martínez (Kurai), que se subiría ao terceiro caixón no seu debut.

Clasificacións:
https://my4.raceresult.com/99654/

Vídeo completo da proba:
https://youtu.be/m9NvvG-hD_w